Кыргызстанда акыркы эки жылдын ичинде туристтик жана гастрономиялык инфратүзүм объекттеринин кескин өсүшү катталды, мында динамика боюнча шаар сыртындагы эс алуу чөйрөсү лидер болду. «2ГИС» картографиялык сервисинин изилдөөсүнүн маалыматтарына ылайык, республиканын картасындагы активдүү эс алуу базаларынын саны 63,8%га — 260тан 426 объектке чейин көбөйгөн.

Конокторду жайгаштыруу сегментинде да олуттуу өсүш катталды: мейманканалардын саны 46,2%га (918 объектке чейин) өссө, ал эми коттедждерди жана конок үйлөрүн кыска мөөнөткө ижарага берүү сектору дээрлик 40%га жогорулап, 1742 бирдикке жетти. Коомдук тамактануу чөйрөсүндө тез тамактануу (фастфуд) сегменти эң динамикалуу өнүгүүдө, мында катталган түйүндөрдүн саны эки жыл ичинде 38,3%га көбөйүп, 2317 объектти түздү.

Сервистин талдоочулары мындай динамиканы кызмат көрсөтүү чөйрөсүндө бизнестин кеңейишине түрткү берген тышкы (өлкөгө келген) жана ички туризмдин жигердүү өнүгүшү менен байланыштырышат. Мейманканалардын, конок үйлөрүнүн жана коомдук тамактануу жайларынын санынын туруктуу өсүшү инфратүзүмдүн сапаттуу жаңырышын, ошондой эле республиканын жарандары жана чет элдик коноктору үчүн жеткиликтүү эс алуу форматтарынын ар түрдүүлүгүнүн көбөйүшүн чагылдырат.