Кыргызстанда Министрлер кабинетине караштуу Мамлекеттик кызмат жана жергиликтүү өз алдынча башкаруу иштери боюнча мамлекеттик агенттик тарабынан мыйзамсыз таштанды жайларын уюштуруу жана туристтик жерлерге таштанды таштоо үчүн өзүнчө жоопкерчиликти, ошондой эле автомобиль жолдорун булгагандык үчүн жазаны күчөтүүнү караган мыйзам долбоору иштелип чыкты. Тиешелүү өзгөртүүлөрдү Укук бузуулар жөнүндө кодекске киргизүү сунушталууда.

Долбоорго ылайык, уруксат берилбеген таштанды жайын уюштургандыгы үчүн жеке жактарга 100 эсептик көрсөткүч (10 миң сом), юридикалык жактарга 230 эсептик көрсөткүч (23 миң сом) өлчөмүндө айып пул салынат. Айып пулдун ордуна 20 саатка чейинки мөөнөткө коомдук жумуштар да каралган.

Жаза чарасы колдонулгандан кийин бир жылдын ичинде эреже кайра бузулса, айып пулдун көлөмүн жеке жактар үчүн 200 эсептик көрсөткүчкө (20 миң сом), юридикалык жактар үчүн 650 эсептик көрсөткүчкө (65 миң сом) чейин көбөйтүү сунушталууда. Альтернативдүү жаза — 20дан 40 саатка чейинки мөөнөткө коомдук жумуштар.

Мыйзам долбоорунда стихиялык (мыйзамсыз) таштанды жайын уюштуруу дегенибиз — атайын бөлүнгөн аймактардан тышкары калдыктарды системалуу түрдө жайгаштыруу үчүн жай түзүү же анын иштешин камсыз кылуу боюнча аракеттер түшүндүрүлөт. Аларга, атап айтканда, таштандыларды ташып келүү, жер тилкесин даярдоо жана таштандыларды такай жыйноо үчүн шарттарды түзүү кирет.

Туристтик жайлардагы таштанды үчүн өзүнчө жазалар

Мыйзам долбоорунда ошондой эле туристтик ресурс болуп саналган жаратылыш объекттеринде, белгиленбеген жерлерге таштанды таштоо, үйүү жана өрттөө үчүн да жоопкерчилик каралган.

Мындай мыйзам бузуу үчүн 20 саатка чейинки коомдук жумуштар же айып пул салуу сунушталууда: жеке жактарга 55 эсептик көрсөткүч (5,5 миң сом), юридикалык жактарга 170 эсептик көрсөткүч (17 миң сом).

Жаза чарасы колдонулгандан кийин бир жылдын ичинде кайталап бузулган учурда айып пулдун өлчөмү жеке жактар үчүн 100 эсептик көрсөткүчтү (10 миң сом), юридикалык жактар үчүн 230 эсептик көрсөткүчтү (23 миң сом) түзөт. Бул учурда коомдук жумуштардын мөөнөтүн 20дан 40 саатка чейин белгилөө сунушталууда.

Жолдорго таштанды таштагандарга айып пулду көбөйтүү сунушталууда

Дагы бир өзгөртүү айдоочулар, жүргүнчүлөр жана жол кыймылынын башка катышуучулары тарабынан автомобиль жолдоруна, анын ичинде транспорт каражаты кыймылдап бараткан учурда таштанды таштоо, үйүү жана өрттөөгө тиешелүү.

Учурда бул аракеттер үчүн 30 эсептик көрсөткүч (3 миң сом) өлчөмүндө айып пул каралган. Мыйзам долбоорунда бул укук бузууну Укук бузуулар жөнүндө кодекстин 188-беренесинин башка бөлүгүнө которуу менен айып пулду 55 эсептик көрсөткүчкө (5,5 миң сом) чейин көбөйтүү сунушталат.

Сунушталган өзгөртүүлөр азырынча күчүнө кире элек. Мыйзам долбоорунун текстине ылайык, ал кабыл алынган учурда расмий жарыяланган күндөн тартып он күн өткөндөн кийин күчүнө кирет.

Анара Мамытова