Жаратылыш ресурстары, экология жана техникалык көзөмөл министрлиги Кыргызстанда заманбап локалдык тазалоочу курулмаларды киргизүү боюнча пилоттук долбоорлорду ишке ашыруу мүмкүнчүлүгүн карап жатат. Бул маселе «Евролос» компаниясынын өкүлдөрү менен болгон жолугушууда талкууланды.

Мекеменин маалыматы боюнча, саркынды сууларды тазалоонун жаңы системаларын биринчи кезекте борборлоштурулган канализация жок болгон эс алуу зоналарында, туристтик кластерлерде жана калктуу конуштарда колдонуу пландалууда.

Министрликтен белгилешкендей, сунушталып жаткан жабдуулар саркынды сууларды биологиялык тазалоонун толук циклин камсыз кылат жана убакыттын өтүшү менен герметикалуулугун жоготуп, жер астындагы сууларды булгаган эскирген бетон септиктерине альтернатива боло алат.

Жолугушуунун жыйынтыгында тараптар техникалык маалымат алмашууну улантууну, пилоттук долбоорлорду ишке киргизүү мүмкүнчүлүгүн карап чыгууну жана узак мөөнөттүү кызматташуунун келечегин изилдөөнү макулдашышты.