КР Эмгек, социалдык камсыздоо жана миграция министрлиги эмгек чөйрөсүндөгү зордук-зомбулукту жана ыдык көрсөтүүнү алдын алуу механизмдерин киргизүү боюнча пилоттук долбоорду ишке киргизүүдө, — деп билдирет ведомствонун басма сөз кызматы.

Долбоор 2026-жылдын 31-июлуна чейин созулары такталды.

Ведомствонун маалыматына караганда, долбоорду ишке ашыруу мезгилине жумуш орундарындагы зордук-зомбулук жана ыдык көрсөтүү учурларын алдын алуу, аныктоо жана кароо тартибин аныктаган убактылуу нускама бекитилди.

Пилоттук этаптын жыйынтыгы боюнча демилгенин натыйжалуулугуна баа берилет. Анын жыйынтыктарынын негизинде тиешелүү механизмдерди мындан ары улуттук деңгээлде киргизүү боюнча сунуштарды даярдоо пландаштырылууда.

Министрликтен ошондой эле жумуш ордунда зордук-зомбулукка же ыдык көрсөтүүгө кабылган жарандар эмгек мыйзамдарын контролдоо жана көзөмөлдөө кызматына 0312 39 16 35 телефону аркылуу кайрыла алышарын билдиришти.