Бишкекте 22-октябрда чакан гидроэнергетиканы өнүктүрүүгө жана Кыргызстанда чакан ГЭСтерди курууну каржылоонун жеткиликтүү механизмдерин издөөгө арналган KYRGYZ HYDRO 2026 каржы-инвестициялык жолугушуусу болуп өттү.

Жолугушуу каржы институттарынын, коммерциялык банктардын, инвестициялык фонддордун, гидроэнергетикалык компаниялардын, жабдуу өндүрүүчүлөрдүн жана потенциалдуу инвесторлордун өкүлдөрүнүн башын бириктирди.

Негизги тема чакан ГЭСтерди куруу долбоорлорун ишке ашыруу үчүн каржы ресурстарына жеткиликтүүлүктү кеңейтүү болду.

Катышуучулар энергетикалык бизнес үчүн каржылоонун кандай инструменттери жеткиликтүү экенин, банктар менен инвесторлор кандай талаптарды коюп жатканын, ошондой эле долбоорлорду даярдоодо жана ишке ашырууда компаниялар кандай чектөөлөргө туш болуп жатканын талкуулашты.

Биринчи панелдик сессия чакан ГЭСтерди курууда колдонула турган каржы инструменттерине арналды. Катышуучулар гидроэнергетикада банктык насыялоо, инвестициялык капиталды тартуу жана лизинг механизмдерин колдонуу мүмкүнчүлүктөрүн карап чыгышты.

Долбоорлорду каржылоо алууга даярдоого өзгөчө көңүл бурулду. Сөз каржы уюмдарынын инвестициялык демилгелерге койгон талаптары, каражат тартуу шарттары жана долбоорлорду ишке ашырууда эске алынышы керек болгон учурдагы чектөөлөр жөнүндө болду.

Ошондой эле ылайыктуу каржылоо механизмдерин табуу үчүн гидроэнергетикалык компаниялардын банктар жана өнүктүрүү фонддору менен кызматташуу мүмкүнчүлүктөрү талкууланды.

Экинчи панелдик сессия гидроэнергетикалык долбоорлорду ишке ашыруунун практикалык маселелерине арналды.

Инвесторлор, ГЭСтердин ээлери жана инженердик компаниялардын өкүлдөрү тармактагы иш тажрыйбалары менен бөлүшүп, долбоорлорду ишке ашыруунун жана технологиялык чечимдерди тандоонун өзгөчөлүктөрүн талкуулашты.

Жабдууларды өндүрүүчүлөр жана жеткирүүчүлөр менен кызматташууга өзгөчө көңүл бурулду. Катышуучулар инженердик чечимдерди тандоодо жана аларды чакан гидроэнергетика долбоорлорунда колдонууда келип чыккан маселелерди карап чыгышты.

КР Кайра жаралуучу энергия булактарынын электр станциялары ассоциациясынын төрайымы Кундус Кырбашева өлкөнүн энергетика тармагын өнүктүрүүдө жеке инвестициялардын стратегиялык маанисин баса белгиледи.

«Кыргызстан олуттуу гидроэнергетикалык потенциалга ээ, бирок аны ишке ашыруу үчүн жеткиликтүү каржы ресурстары, заманбап технологиялар жана бизнестин каржы институттары менен натыйжалуу кызматташуусу зарыл. Бүгүн биздин милдет — көйгөйлөрдү талкуулоодон конкреттүү инвестициялык чечимдерге өтүү. Чакан ГЭСтер таза электр энергиясынын булагы гана болбостон, аймактарды өнүктүрүүнүн, энергетикалык коопсуздукту чыңдоонун жана инвестиция тартуунун маанилүү куралына айланышы керек», — деп белгиледи Кундус Кырбашева.

Ал чакан гидроэлектр станцияларын курууга жеке капиталды жигердүү тартууга өбөлгө түзө турган жеткиликтүү жана практикалык жактан колдонууга жарактуу каржылоо механизмдерин калыптандыруунун маанилүүлүгүн кошумчалады.

KYRGYZ HYDRO 2026 жолугушуусунун соңку бөлүгү B2B форматында өттү. Гидроэнергетикалык компаниялардын өкүлдөрү каржы институттарынын өкүлдөрү, потенциалдуу инвесторлор жана инженердик чечимдерди жеткирүүчүлөр менен түздөн-түз баарлашууга мүмкүнчүлүк алышты.