Бүгүн, 28-майда, Бишкек шаарына Кытайдан атчан саякаттап келген этникалык кыргыз кыздары Риза Дүйшөн кызы жана Гүлсанат Али кызы келишти. Аларды «Супара» этно-комплексинде салтанаттуу тосуп алышты.

Бишкек мэриясынын маалыматында, конокторду калаа мэринин биринчи орун басары Кубанычбек Иманалиев менен маданият министринин орун басары Аскаралы Мадаминов тосуп алышкан. Саякатчы кыздарга белектер тапшырылып, белгилүү ырчылардын жана музыканттардын коштоосунда концерт уюштурулган.

Кыргыз кыздары сапарын Кытайдын Кызыл-Суу Кыргыз автоном облусунан башташкан. Алар Кыргызстандын аймагына «Торугарт» көзөмөл-өткөрүү пункту аркылуу кирип, Нарын жана Ысык-Көл облустарын ат менен басып өтүп борбор калаага жетишкен.