Манас районунун Кызыл-Жылдыз айылында «Адис Нан» ЖЧКсынын жаңы өндүрүш комплекси толук долбоордук кубаттуулугуна чыгууга даярданууда. Ишканада курулуш иштери толугу менен аяктап, нан жана кондитердик азыктарды чыгаруучу үч заманбап цех пайдаланууга берилди. Алар жергиликтүү тургундарды 90 жумушчу орун менен камсыз кылат.

Кайра иштетүүчү ишкананын долбоордук кубаттуулугу суткасына 2,5 тонна унга чейин жетет. Чыгарылып жаткан продукция Манас районунун жана Талас облусунун башка калктуу конуштарынын соода түйүндөрүнүн текчелерине сатыкка түшө баштады. Объект аймактын экономикалык өсүшүнүн негизги чекиттеринин бири катары «100 өнөр жай ишканасы — 2026» мамлекеттик тизмесине расмий түрдө киргизилген.

Демилгени ишке ашыруунун жүрүшү менен айыл чарба министринин орун басары Рустам Балтабаев таанышып, тармактык түзүмдөргө жана каржы институттарына заводду мындан ары жеңилдетилген насыя менен камсыз кылуу маселелерин ыкчам иштеп чыгууну тапшырды. Мындай өндүрүштөрдү өнүктүрүү импортту алмаштырууга жана президент тарабынан коюлган 2040-жылга чейин ата мекендик айыл чарба чийки затын кайра иштетүү деңгээлин 50%га чейин жеткирүү максатын аткарууга багытталган.