Жалал-Абаддын Майлуу-Суу шаарында эки тааныштын чыры адам өлүмү менен аяктаган. Бул тууралуу облустук милициядан билдиришти.
Маалым болгондой, 6-февралда болжол менен саат 18:00до милицияга шаар тургуну чалып, 65 жаштагы жаран белгисиз себептер менен каза болгонун билдирген.
Бул окуя милицияда каттоого алынып, маркумдун өлүмүнүн себебин аныктоо үчүн соттук-медициналык экспертиза дайындалган. Анын жыйынтыгы маркум ур-токмоктон каза болгонун көрсөткөн.
Аталган факт боюнча Кылмыш-жаза кодексинин 130-беренесине (ден соолукка оор залал келтирүү) ылайык кылмыш иши козголгон.
Ыкчам-иликтөө иштеринин натыйжасында шектүү катары 51 жаштагы Б.З. аттуу жаран кармалып, тергөө аяктаганча 2 айга камакка алынган.
Милициянын маалыматы боюнча, шектүү тергөө учурунда билдиргендей, ал маркум менен ичимдик ичип отуруп, пикир келишпестиктен сабап салган.
Учурда тергөө амалдары жүрүүдө.
