Министрлер кабинетинин төрагасы Акылбек Жапаров Дүйнөлүк көчмөндөр оюндарынын алкагында Кырчын жайлоосунда «Көчмөндөр ааламы: жандуу мурас» этношаарчасынын ачылыш аземине катышты. Иш-чаранын алдында ал президенттин облустардагы ыйгарым укуктуу өкүлчүлүктөрүнүн атайын уюштурулган боз үй комплекстери менен таанышып чыкты.

Салтанатта сөз сүйлөп жатып, Акылбек Жапаров VI Дүйнөлүк көчмөндөр оюндарына 31-августта — өлкөнүн эгемендүүлүгүнүн 35 жылдыгында президент Садыр Жапаров, мамлекет жана өкмөт башчылары жана жогорку даражалуу делегациялардын катышуусунда старт берилгенин эске салды. Салтанаттуу ачылыш 51 миң көрүүчүгө ылайыкталган жаңы «Бишкек Арена» стадионунда өткөн. «Биз сыймыктануу менен айта алабыз: дүйнө жаңы Кыргызстандын духун сезди!» — деди Министрлер кабинетинин башчысы, салтанат кыргыз элинин байыркы тарыхы менен заманбап технологияларды бириктиргенин белгилеп.

Анын айтымында, Оюндардын негизги иш-чаралары Ысык-Көлдүн ыйык жерлериндеги сегиз аянтчада уланууда. Акылбек Жапаров акыркы беш жылда өлкө өзгөргөнүн — ири стратегиялык долбоорлор ишке ашырылып, «Ынтымак Ордо», «Ырыс Ордо» жана жаңы стадион сыяктуу жаңы доордун символдору курулганын белгиледи. Ал Кырчындагы этношаарча жана ага алып баруучу жаңыланган жол бир күндүк эмес экенин, жол туризмди өнүктүрүүгө, ал эми этношаарча бабалардын мурасын сактоого жана жайылтууга кызмат кыларын баса белгиледи.

Акылбек Жапаров этношаарчада өзгөчө маданий мейкиндик түзүлгөнүн белгиледи: «Бул жерде кыргыз боз үйлөрү катар тигилген. Улуттук кийимдер, элдик кол өнөрчүлүк, салттуу оюндар, каада-салттар, ыр-күүлөр — кылымдарды карытып бизге жеткен дүйнө бүгүн бул жерде бир бүтүн катары тартууланды». Анын айтымында, «Көчмөндөр ааламы: жандуу мурас» аталышынын өзүндө терең маани бар — бабалардын мурасы музейдин айнегинде гана сакталбастан, элдин жашоосуна кайтып келүүдө: боз үй тигүү, комуз чертүү, шырдак жасоо, темир жана ат жабдыктарын согуу — мунун баары муундан муунга өтүп жаткан тирүү мурас.

Сөзүнүн соңунда Акылбек Жапаров Дүйнөлүк көчмөндөр оюндарынын эң чоң жеңиши бабалардын бай мурасын сактоо жана аны келечек муунга аярлап өткөрүп берүү болушун каалады.