Келишимдик жана кепилдик милдеттенмелерин тийиштүү деңгээлде аткарбагандыгы үчүн «ММ Стиль» ЖЧКсы Бишкек мэриясынын ишенимсиз берүүчүлөрүнүн жана подрядчыларынын реестрине киргизилди. Бул тууралуу борбор калаанын муниципалитетинин басма сөз кызматы билдирди.

Маалыматка ылайык, 2025-жылы компания Октябрь районунун муниципалдык администрациясы менен 8-чи, 9-чу, 10-чу кичи райондордо жана «Тунгуч» кичи районунда сугат тутумун куруу боюнча келишимдерди түзгөн. Жумуштар 2026-жылдын 1-апрелине чейин бүтүшү керек болчу.

Текшерүү учурунда ирригациялык лотокторду орнотууда жана асбест түтүктөрүн төшөөдө эреже бузуулар, тутумдун айрым элементтеринин бузулушу, бетон конструкцияларындагы жаракалар жана зыяндар аныкталган. Ошондой эле жантаюулардын туура эмес коюлушу, чектеш жол катмарынын чөгүүсү, конструкциялардын жетишсиз бекемделиши жана сапатсыз асбест түтүктөрүнүн колдонулушу катталган.

Мэриянын маалыматы боюнча, жумуштар 8-кичи райондо 85 пайызга, 9-кичи райондо — 99 пайызга, ал эми 10-кичи райондо — 90 пайызга аткарылган.

Аныкталган кемчиликтерге карабастан, подрядчы аларды четтетүү боюнча талаптарды жана кепилдик милдеттенмелерди толук көлөмдө аткарган эмес.

Ушуга байланыштуу «ММ Стиль» ЖЧКсы мэриянын ишенимсиз (ак ниет эмес) берүүчүлөрүнүн жана подрядчыларынын реестрине киргизилди.