2026-жылдын 1-сентябрына чейин (ишкердик ишмердүүлүк үчүн колдонулбаган) турак үйлөргө жана батирлерге, ошондой эле үй жанындагы, короо-жай жана бакча жер тилкелерине салык төлөө зарыл. Мамлекеттик салык кызматынан (МСК) муну «Салык төлөөчүнүн кабинети» аркылуу онлайн кантип кылуу керектигин эскертишти.

Бул үчүн төмөнкүлөр зарыл:

• «Салык төлөөчүнүн кабинетине» кирүү;
• башкы баракчадагы «Салыктык милдеттенмелер» бөлүмүнөн төлөм жүргүзүлө турган мүлк объектисин тандоо. Бул жерде учурдагы салык мезгили үчүн чегерилген мүлк салыгынын суммасы көрсөтүлөт;
• мүлк объектисин тандагандан кийин система төлөнүүгө тийиш болгон чегерилген салыктын суммасы жөнүндө маалыматты көрсөтөт;
• «Төлөө» баскычын басуу. Система автоматтык түрдө төлөм жүргүзүү үчүн QR-кодду жана тандалган салыктын түрү боюнча акча которуу үчүн банктык реквизиттерди (эсептешүү эсебин) түзүп берет;
• QR-кодду же банктык реквизиттерди колдонуп, каалаган ыңгайлуу ыкма менен төлөмдү жүргүзүү.

Белгиленгендей, мүлк салыгын чегерүү жөнүндө салыктык билдирмелер салык органы тарабынан салык төлөөчүлөргө учурдагы салык мезгилинин 1-августунан кечиктирилбестен жөнөтүлөт. Салыктык билдирме — тиешелүү салык мезгили үчүн чегерилген мүлк салыгынын суммасы жөнүндө маалыматтарды камтыган документ.

Билдирмени «Салык төлөөчүнүн кабинети» аркылуу көрүү үчүн төмөнкүлөр зарыл:

• «Салык төлөөчүнүн кабинетинде» авторизациядан өтүү;
• башкы баракчадагы «МСК менен кат алышуу» бөлүмүнө өтүү;
• «Билдирүүлөр» бөлүмчөсүн ачуу;
• «Мүлк боюнча МСКнын билдирмеси» документин ачуу. Бул бөлүмдө мүлк салыгын чегерүү жөнүндө билдирменин басып чыгарууга боло турган версиясы жеткиликтүү.

Зарыл болгон учурда документти көрүүгө, жүктөп алууга же басып чыгарууга болот.