Бишкекте мыйзамсыз митингге катышууга жана башка укукка каршы аракеттерге чакырган материалдарды жарыялоого шектелген Threads социалдык тармагындагы аккаунттун ээси кармалды. Бул тууралуу борбор калаанын ИИББдин (ГУВД) басма сөз кызматы билдирди.

Мекеменин маалыматы боюнча, социалдык тармактарга мониторинг жүргүзүү учурунда мурда beksultankg99 деп аталган Slivy_telegramm аккаунту аныкталган.

Баракчада Кытай жарандарына карата терс мүнөздөгү материалдар, ошондой эле коомдук тартипти бузууга алып келиши мүмкүн болгон аракеттерге чакырыктар системалуу түрдө жарыяланып келгени айтылат.

Атап айтканда, ИИББ билдиргендей, бул аккаунт аркылуу 23-июлда Ала-Тоо аянтында өткөрүлүшү пландалган мыйзамсыз митингге катышуу чакырыктары таркатылган.

Кыргыз Республикасынын Кылмыш-жаза кодексинин 278-беренесинин 3-бөлүгү («Бийлик өкүлдөрүнүн мыйзамдуу талаптарына жигердүү баш ийбөөгө, массалык башаламандыктарга жана жарандарга карата зомбулук көрсөтүүгө чакырыктар») боюнча кылмыш иши козголду.

Ыкчам-издөө иш-чараларынын жүрүшүндө милиция кызматкерлери аккаунттун болжолдуу ээсин аныкташкан. Ал 2003-жылы туулган О. А. болуп чыкты. Ал Бишкек ИИББдин тергөө кызматына жеткирилди. Жаран текшерүү үчүн iPhone 14 Pro үлгүсүндөгү уюлдук телефонун өз ыктыяры менен өткөрүп берди.

Ошондой эле дагы үч уюлдук телефон жана ноутбук алынды. Техникалар кылмыш ишинин материалдарына буюм далили катары тиркелди. Шектүү кармалып, убактылуу кармоочу жайга киргизилди. Бишкектин Биринчи Май райондук сотунун токтому менен ага карата эки айлык мөөнөткө камакка алуу түрүндөгү бөгөт коюу чарасы тандалды. Ал №21 мекемеде (СИЗО-1) кармалат.

Тергөө иштери уланууда.

Бишкек ИИББ жарандарды мыйзам талаптарын сактоого жана социалдык тармактарда массалык башаламандыктарга, зомбулукка, мыйзамсыз митингдерге жана башка укукка каршы аракеттерге чакырган материалдарды таратпоого чакырды.