Кечээ жакында «Наристе» VI Эл аралык балдар фольклордук фестивалына катышуу үчүн Бишкекке Санкт-Петербург жана Пушкино шаарларынан делегациялар келди. Бул тууралуу борбор калаанын муниципалитетинин басма сөз кызматы билдирди.

Маалым болгондой, делегациялар өз өлкөсүнүн балдар фольклордук искусствосун, улуттук маданиятын жана каада-салттарын тартуулашат.

Россиядан келген делегациялардын катышуусу фестивалдын эл аралык статусун баса белгилейт жана өлкөлөр ортосундагы маданий кызматташтыктын кеңейип жаткандыгынан кабар берет.

Быйыл фестиваль дүйнөнүн ар кайсы өлкөлөрүнөн келген катышуучулардын башын бириктирип, мазмундуу концерттик, билим берүүчү жана маданий программанын форматында өтүүдө.

«Наристе» VI Эл аралык балдар фольклордук фестивалы салтка айлангандай улуттук маданиятты, музыканы жана бий искусствосун тартуулаган балдардын чыгармачыл жамааттарын чогултуп, маданий диалог, чыгармачылык тажрыйба алмашуу жана эл аралык байланыштарды чыңдоо үчүн аянтча түзүп келет.

Бишкек мэриясы Санкт-Петербург жана Пушкино шаарларынан келген делегацияларды жылуу тосуп алат жана катышуучуларга ийгиликтүү өнөр көрсөтүүнү, жаңы таанышууларды жана Кыргызстандагы күндөрүнөн жаркын таасирлерди каалайт.