Нарын мамлекеттик коругундагы марал багуучу жайдын аймагы 32 гектарга көбөйтүлдү. Эми тосулган зонанын жалпы аянты 82 гектарды түзөт. Кеңейтилген аймак маралдарды багуу жана көбөйтүү шарттарын жакшыртууга мүмкүндүк берет. Нарын мамлекеттик коругунун жалпы аянты 112,4 миң гектарды түзөт.

Коруктун аймагында сүт эмүүчүлөрдүн 26 түрү, канаттуулардын 104 түрү, балыктын үч түрү, жерде-сууда жашоочулардын бир түрү жана сойлоп жүрүүчүлөрдүн төрт түрү байырлайт. Бул жерде Кызыл китепке киргизилген ак илбирс, сүлөөсүн, манул, тянь-шань күрөң аюусу, марал, аркар, ошондой эле жырткыч канаттуулардын сейрек кездешүүчү түрлөрү кездешет.

Мындан тышкары, корукта өсүмдүктөрдүн 500дөн ашык түрү, анын ичинде баалуу дары чөптөр өсөт.

Маралдарды көбөйтүү алардын популяциясын калыбына келтирүү максатында жүргүзүлүүдө. 2018-жылы багуучу жайда өстүрүлгөн тогуз марал биринчи жолу Жалал-Абад облусунун Аксы районундагы Авлетим токой чарбасына өткөрүлүп берилген.