Назарали Арипов Кыргызстандын Тажикстан Республикасындагы Атайын жана Ыйгарым укуктуу элчиси болуп дайындалды. Тиешелүү жарлыкка президент Садыр Жапаров кол койду.

Назарали Арипов 1970-жылы 28-апрелде Баткен облусунун Лейлек районундагы Кара-Булак айылында туулган. Ош технологиялык университетин «Жол кыймылын уюштуруу» адистиги боюнча аяктаган.

Ар кайсы жылдары ишкердик менен алектенип, бир нече жеке компанияны, ошондой эле Милдеттүү медициналык камсыздандыруу фондунун Ош шаары боюнча аймактык башкармалыгын жетектеген.

2007-жылы Арипов Ош шаардык кеңешинин депутаты болуп шайланган. 2010-2015-жылдары «Республика» саясий партиясынан Жогорку Кеңештин V чакырылышынын депутаты болгон.