Мамкурулушка караштуу Сейсмотуруктуу курулуш институтунун Түштүк башкармалыгынын адистери Кара-Суу районунун Кызыл-Шарк айылындагы спорт залга деталдуу инженердик-техникалык изилдөө жүргүзүштү. Имаратта чыккан өрттөн кийин Савай айыл өкмөтүнүн кайрылуусу мындай пландан тышкаркы текшерүү жүргүзүүгө себеп болгон.

Эксперттер келтирилген чыгымдын чыныгы көлөмүн баалоо максатында жеринде техникалык документтерди кылдат изилдеп чыгышты. Башкы милдет — жалын имараттын негизги көтөрүүчү конструкцияларын канчалык деңгээлде жабыркатканын жана имараттын каркасы коопсуз экенин аныктоо болду. Жүргүзүлгөн өлчөөлөрдүн негизинде инспекторлор тиешелүү чиймелерди даярдашты.

Жакынкы арада тармактык институт объектинин техникалык абалы боюнча расмий корутунду чыгарат. Документте спорт залды капиталдык оңдоп-түзөөдөн өткөрүүгө болобу же аны андан ары пайдаланууга мүмкүн эмеспи деген так сунуштар берилет.