Кыргыз Республикасынын Суу ресурстары, айыл чарба жана кайра иштетүү өнөр жайы министрлигине караштуу Кайра иштетүү өнөр жайы жана органикалык айыл чарба департаменти органикалык айыл чарбасын өнүктүрүү, айыл чарба кооперативдерин колдоо жана күнөскана чарбачылыгын жайылтуу боюнча иш-чараларды улантууда.

БУУнун Өнүктүрүү программасынын (ПРООН) «Кооперативдерди колдоо» долбоорунун алкагында «Демилгелерди өнүктүрүү агенттигинин» кызматкерлери департаменттин адистери менен биргеликте Ош облусунун Ноокат жана Чоң-Алай райондорундагы айыл чарба кооперативдери менен жолугушууларды өткөрүштү.

Жолугушууларга «Жар-Башы», «Чоң-Алай Картошка Өндүрүү», «Чоң-Алай Агро», «НҮКӨК», «Шарип-Ата» жана «Кыргыз-Ата Алмасы» кооперативдеринин өкүлдөрү катышты.

Долбоордун негизги максаты — айыл чарбасын колдоо, кооперативдерди өнүктүрүү жана органикалык продукция өндүрүүнү жайылтуу.

Долбоордун алкагында ар бир кооператив үчүн аянты 400 чарчы метр болгон күнөскана жана аянты 70 чарчы метр болгон биогумус (вермикомпост) өндүрүү аянтчасын куруу каралган. Мындан тышкары, окутуу семинарлары уюштурулуп, органикалык айыл чарбасына өтүүгө көмөк көрсөтүлөт.

Министрликтин маалыматына ылайык, долбоорду ишке ашыруу органикалык айыл чарбасын өнүктүрүүгө, кооперативдердин мүмкүнчүлүктөрүн кеңейтүүгө жана экологиялык жактан таза продукциянын өндүрүш көлөмүн көбөйтүүгө өбөлгө түзөт.