Кыргызстандын президенти Садыр Жапаров Андраш Баканы Мажарстандын президенти болуп шайланышы менен куттуктап, куттуктоо катын жөнөттү. Бул тууралуу президенттик администрация кабарлады.

Мамлекет башчысы өз куттуктоосунда Андраш Баканын президенттик мөөнөтү Мажарстандын өнүгүүсү жана бакубаттуулугунун жогорулашы менен коштолоруна ишеним билдирген. Ал эки өлкөнүн ортосундагы өз ара урматтоого жана тарыхый-маданий жакындыкка негизделген достук мамилелерди белгилеп өткөн.

Ошондой эле Жапаров Кыргызстан менен Мажарстандын ортосундагы стратегиялык өнөктөштүктүн деңгээлин жогору баалаган:

«Кыргызстан менен Мажарстандын ортосунда жетишилген стратегиялык өнөктөштүктүн деңгээлин жогору баалайм. Соңку жылдары ал туруктуу жана көп кырдуу мүнөзгө ээ болду.

Өлкөлөрүбүздү байланыштырып турган достуктун жана өз ара түшүнүшүүнүн салттары мындан ары да эки тараптуу байланыштарды ырааттуу кеңейтүүгө жана Кыргызстан менен Мажарстандын элдеринин кызыкчылыктарына жооп берген жаңы биргелешкен демилгелерди ишке ашырууга бекем негиз болуп берет деп ишенем», — деген ал.

Куттуктоонун соңунда өлкө башчы Андраш Бакага бекем ден соолук жана ийгиликтерди, ал эми Мажарстан элине тынчтык жана өнүгүү каалаган.