Кыргызстандын Президенти Садыр Жапаров 17-сентябрда Корея Республикасына (Түштүк Корея) болгон расмий сапарынын алкагында Сеулда өлкөнүн премьер-министри Хан Сон Сук менен сүйлөшүүлөрдү өткөрдү. Бул тууралуу мамлекет башчысынын басма сөз кызматы билдирет.

Маалыматка ылайык, тараптар кыргыз-корей кызматташтыгын талкуулап, соода-экономикалык байланыштарды кеңейтүүгө, инвестицияларды тартууга жана биргелешкен долбоорлорду ишке ашырууга өзгөчө көңүл бурушту.

Хан Сон Сук корей тараптын өз ара пайдалуу кызматташтыкты мындан ары да кеңейтүүгө даяр экенин билдирди. Анын айтымында, Кыргызстанда корей компанияларынын ишмердүүлүгү үчүн жагымдуу шарттарды түзүү жана эки өлкөнүн ортосундагы ишкердик байланыштарды өнүктүрүү зарыл.

Премьер-министр ошондой эле Түштүк Кореядан Кыргызстанга келген туристтердин агымы өскөнүн белгиледи. Анын айтымында, 2023-жылдан бери иштеп жаткан түз аба каттамы туристтик алмашууну көбөйтүүгө жана эки тараптуу байланыштарды чыңдоого өбөлгө түзүүдө.

Хан Сон Сук Корея Республикасынын технологиялык потенциалына жана Кыргызстандын жаратылыш ресурстарына көңүл бурду. Анын пикиринде, бул эки өлкөнүн потенциалын жана тажрыйбасын бириктирүүгө, ошондой эле өз ара пайдалуу кызматташтыкты өнүктүрүүгө кеңири мүмкүнчүлүктөрдү берет.

Тараптар санариптештирүү жана жасалма интеллект тармагындагы өз ара аракеттенүүнү, анын ичинде тажрыйба алмашууну, Корея Республикасынын технологиялык мүмкүнчүлүктөрүн жана Кыргызстандын дараметин пайдаланууну өзүнчө талкуулашты.

Садыр Жапаров Кыргызстан Корея Республикасы менен кызматташтыкты мындан ары өнүктүрүүгө жана өлкөдө корей бизнесинин кеңейишине кызыкдар экенин билдирди.

«Биз айрым инвестициялык долбоорлорду ишке ашырууга гана эмес, Кыргызстанда корей бизнесинин кеңири жана узак мөөнөттүү катышуусуна да кызыкдарбыз. Өнөр жай кооперациясын өнүктүрүүгө, биргелешкен өндүрүштөрдү түзүүгө жана өндүрүштү локалдаштырууга өзгөчө көңүл бурабыз», — деди президент.

Жапаров корей компанияларын автоунаа куруу, фармацевтика, текстиль өнөр жайы, электроника жана башка тармактардагы долбоорлорду ишке ашырууга катышууга чакырды.

Ал ошондой эле Кыргызстан менен Корея Республикасынын өкмөттөрүнө биргелешип бир нече артыкчылыктуу инвестициялык долбоорлорду аныктоону жана аларды концепцияны иштеп чыгуудан баштап өндүрүштү ишке киргизүүгө чейинки бардык этаптарда коштоп жүрүүнү камсыз кылууну сунуштады.

Мындан тышкары, тараптар Корея Республикасында эмгектенип жаткан Кыргызстандын жарандарынын маселесине токтолушту. Жапаров алардын санынын өсүшү пенсиялык камсыздоо чөйрөсүндөгү укуктук базаны мындан ары өркүндөтүүнү талап кыларын белгиледи.

Буга байланыштуу мамлекет башчысы эки өлкөнүн өкмөттөрүнүн ортосундагы пенсиялык камсыздоо боюнча макулдашуу сүйлөшүүлөрүн тездетип бүтүрүүнү жана документти кол коюуга даярдоону сунуштады.

Сүйлөшүүлөрдүн жыйынтыгында Садыр Жапаров менен Хан Сон Сук эки өлкөнүн мамлекеттик органдарынын ортосундагы өз ара кызматташууну улантуу зарылдыгын баса белгилешти жана жетишилген макулдашууларды ишке ашыруу боюнча биргелешип иштөөгө даяр экендиктерин ырасташты.