«Чек талап кылып, байге утуп ал!» кызыктыруучу лотереясынын катышуучулары тарабынан 2023-жылдын 1-июлуна чейин топтолгон жана утуштун биринчи этабына катышкан бардык ID-номерлер жокко чыгарылды. Бул тууралуу Салык кызматынан билдиришти.
Маалыматка караганда, лотереянын шарттарына ылайык, 2023-жылдын 2-июлунан тартып ID-номерлерди топтоо кайрадан башталды.
Экинчи турга 2023-жылдын 1-июлунан тартып 25-декабрына чейин берилген кассалык чектер катышат.
Биринчи этаптын жеңүүчүлөрү утуштун экинчи этабына катыша алышпайт.
Эскерте кетсек, 25-декабрдан 30-декабрга чейин лотереянын экинчи этабы өткөрүлөт, анда Бишкектен 10 батир, 10 электромобиль, чет өлкөгө 3 жолдомо, 500 iPhone14, 500 смартфон, 150 ноутбук, Дайсон маркасындагы 20 фен ойнотулат.
ККМдин кассалык чеги – керектөөчүнүн укугун коргогон документ. Кассалык чек талап кылып, укугуңуздун бузулушуна жол бербеңиз.
Ал эми Салык кызматы жарандарга пайдалуу менен жагымдууну айкалыштырууга уникалдуу мүмкүнчүлүк түзүүдө. Кассалык чек – бул керектөөчүнүн укугун коргоо гана эмес, лотереяга акысыз катышуу жана жаңы жылдын алдында баалуу байге утуп алуу мүмкүнчүлүгү.
Лотереяга катышуу үчүн «Салык чек» мобилдик тиркемесин жүктөп, каттоодон өтүңүз жана товарларды/кызматтарды сатып алуудан кассалык чектерди сканерлеңиз.
Биздин Телеграм каналга катталыңыз
