Кыргызстанда сауна жана мончо кызматтарын көрсөткөн, ошондой эле коомдук тамактануу тармагында иш жүргүзгөн ишкердик субъектилер үчүн бирдиктүү салыктын ставкалары төмөндөтүлөт. Бул тууралуу Мамлекеттик салык кызматы билдирди.

Президент Садыр Жапаров кол койгон «Салык салуу жана салыктык башкаруу системасын өркүндөтүү боюнча чаралар жөнүндөгү» жарлыкка ылайык, жаңы салык ставкалары төмөнкүдөй белгиленди:

• Сауна жана мончо кызматтарын көрсөткөндөр субъектилер үчүн салык ставкалары 5%га төмөндөтүлдү (буга чейин 8% болгон);
• Коомдук тамактануу тармагындагы субъектилер үчүн салык ставкалары Бишкек жана Ош шаарларында 5%, башка аймактарда 3% деп белгиленди.

Мындан тышкары, турак жай жана турак жай эмес жайларды алгачкы жолу сатуу менен алектенген ишкерлер үчүн бирдиктүү салыктын ставкасы төлөмдүн түрүнө карабастан 4% деп белгиленди. Бул категориядагы субъекттер үчүн гана салыкты алдын ала төлөө талабы сакталат.