11-июнда Министрлер Кабинетинин Төрагасынын орун басары — министр Эрлист Акунбеков Швейцариянын Элчиси Сироко Мессерли менен жолугушту. Тараптар суу ресурстарын башкаруу, айыл чарбасын өнүктүрүү жана заманбап агроинновацияларды киргизүү чөйрөлөрүндө эки тараптуу өнөктөштүктү кеңейтүүнү макулдашышты.

Жолугушуунун жүрүшүндө өлкөнүн суу секторун реформалоого багытталган «КРда сууну пайдаланууга уруксат берүү тутуму (WUP KG)» долбоорун ишке ашырууга швейцариялык салымдын маанилүүлүгү баса белгиленди. Ошондой эле тараптар органикалык дыйканчылык, мал чарбачылыгы, ветеринария, балык чарбасы жана аквакультура жаатындагы кызматташтыктын келечегин деталдуу карап чыгышты.

Сүйлөшүүлөрдүн жыйынтыгында ата мекендик продукциянын экспорттук потенциалын жогорулатууга багытталган жаңы биргелешкен программаларды ишке киргизүүгө эки тараптуу даярдык ырасталды. Узак мөөнөттүү кызматташтыктын алкагында агроөнөр жай комплексин санариптештирүүгө жана аймактардын климаттык туруктуулугун бекемдөөгө өзгөчө көңүл буруу пландаштырылууда.