Сокулук районундагы Кыргыз мамлекеттик асыл тукум заводу 10 гектар аянтта кант кызылчасын өстүрүүдө. Себүү үчүн Франция жана Германия селекциясындагы жогорку түшүмдүү сорттор колдонулууда.

Суу ресурстары, айыл чарба жана кайра иштетүү өнөр жайы министрлигинин маалыматына ылайык, учурда эгиндердин абалы жакшы. Бардык агротехникалык иш-чаралар белгиленген талаптарга ылайык жүргүзүлүп жатат.

Адистер топуракка үзгүлтүксүз анализ жүргүзүп турушат. Анын жыйынтыгына жараша өсүмдүктөрдүн толук кандуу өсүшү жана өнүгүшү үчүн зарыл болгон минералдык жер семирткичтер өз убагында берилүүдө.

Алдын ала эсептөөлөр боюнча, түшүмдүүлүк гектарына 600–700 центнерди түзөт.

Министрликтен белгилешкендей, жүргүзүлүп жаткан иштер жогорку түшүм алууга гана эмес, заманбап агротехнологияларды айыл чарба өндүрүшүнө киргизүүгө жана ата мекендик кант өндүрүшүнүн чийки зат базасын чыңдоого да багытталган.