Сокулук районунун Жаңы-Жер адам өлтүрүү фактысы катталганын Чүй облустук ички иштер башкы башкармалыгынан билдиришти.
22-сентябрда Сокулук райондук ички иштер бөлүмүнө Бишкек шаарындагы клиникалык ооруканага Жаңы-Жер айылынын тургуну, 1954-жылы туулган А.А.нын курсагына ок тийип, жансыз денеси жеткирилгени маалымдалган.
Дагы бир тургун, 1986-жылы туулган Г.М да октон жараат алып жеткирилген. Ал оорукананын жандандыруу бөлүмүнө жаткырылган.
Аталган факты Сокулук райондук милициясында катталып, Кылмыш-жаза кодексинин 122-беренеси (адам өлтүрүү) менен кылмыш иши козголгон.
Иликтөө иштеринин жүрүшүндө окуя айылдаштар, жаштардын ата-энелеринин ортосунда болуп, муундар арасында «улууларды сыйлоо» эрежесин сактабагандыктан чыр-чатактар болгондугу аныкталган.
«Окуяга катышкан эки тарап тең бир улуттан, алардын ортосунда мурда эч кандай чыр-чатак болгон эмес. Учурда окуянын бардык катышуучулары аныкталып, бардык зарыл болгон тергөө амалдары жүргүзүлүүдө», — деп айтылат маалыматта.
Кылмыш иликтөөнүн жүрүшү жана жүргүзүлүп жаткан бардык иштер ИИМ жетекчилигинин көзөмөлүндө. Бардык тергөө иш-чаралары аяктагандан кийин кошумча маалымат берилет.
Биздин Телеграм каналга катталыңыз
