Талас облусунда калкты коомдук транспорт менен камсыздоо максатында «Yutong» компаниясынын 30 электробусун сатып алуу пландалууда. Бул тууралуу Президенттин Талас облусундагы ыйгарым укуктуу өкүлү Эрмат Жумаев билдирди.

Анын айтымында, автобустарды лизинг жолу менен сатып алууга президент тарабынан 180 миллион сом бөлүнгөн.

Маалыматка ылайык, электробустар кубатталгандан кийин 200 чакырым аралыкка чейин жүрө алат. Буга чейин аталган техниканы сыноодон өткөрүү иштери жүргүзүлгөн.

Жакынкы күндөрү тиешелүү келишим түзүлүп, электробустар эки айдын ичинде Талас облусуна жеткирилет. Жаңы автобустарды өлкөнүн Эгемендүүлүгүнүн 35 жылдыгына карата пайдаланууга берүү пландаштырылып жатканы айтылды.