Түндүк-Түштүк альтернативдик унаа жолунун 270-271-чакырым аралыгында ири көлөмдөгү таш көчкү түшүп, учурда тазалоо иштери жүрүүдө. Бул тууралуу Транспорт жана коммуникациялар министрлиги билдирди.

Маалыматка ылайык, таш көчкүнүн болжолдуу көлөмү 55-60 миң куб метрди түзөт. Окуя 4-июнда саат 17:30 чамасында болуп, жол жабылып калган.

Азыркы тапта №18 Жол тейлөө ишканасы тарабынан тазалоо иштери жүргүзүлүүдө. Ишке эки экскаватор, эки жүктөгүч (погрузчик) жана эки ХОВО автоунаасы тартылган. Мындан тышкары, башка аймактардан кошумча техникалар келиши күтүлүүдө.

Эске салсак, Түндүк-Түштүк альтернативдик 1-июндан 1-ноябрга чейин убактылуу ачылган. Унаа кыймылына күндүзгү убакытта, саат 06:00дөн 20:00гө чейин гана уруксат берилет.