Нарындын Ак-Сай өрөөнүндөгү Көл-Суу көлүндө кышында муз бетинде унаа айдоого тыюу салынды. Бул тууралуу Өзгөчө кырдаалдар министрлиги билдирди.

Буга чейин соцтармактарга тоңуп турган Көл-Сууга туристтер унааларын айдап, жарышып, оюн уюштурганы тартылган видео тараган. Бул көрүнүш экоактивисттердин нааразычылыгын туудурган.

Андан кийин жерине мамлекеттик органдардын өкүлдөрүнөн турган комиссия барып, Кел-Суу көлүндөгү муз үстүнө күйүүчү май тамбагандыгын, резина калдыктары калбагандыгын, ошондой эле экологияга жана айлана-чөйрөдө терс таасир тийбегендигин аныктаган. Алар муз бетинде унаа айдоого тыюу салган.

Ошондой эле туристтерди тоскон “Медер Ютком” мейманканасынын ээси менен түшүндүрүү иштери жүргүзүлгөн.