Бүгүн, 1-сентябрда, Ысык-Көлдүн Өрнөк айылындагы Көчмөндөр цивилизация борбору музейинде «Улуу тоолор баяны» аттуу живопись жана скульптура көргөзмөсү ачылды. Көргөзмө VI Дүйнөлүк көчмөндөр оюндарынын алкагында өтүүдө.

Маданият министрлигинин маалыматында, бул масштабдагы сүрөт искусствосунун экспозициясы Көчмөндөр оюндарынын программасына биринчи жолу киргизилип жатат. Көргөзмөнүн максаты — кыргыз элинин тарыхын, маданиятын жана руханий мурасын искусство аркылуу чагылдыруу.

Экспозицияга 45 живопись чыгармасы коюлган. Чыгармаларда боз үй, көч, ат, комуз, аңчылык жана жоокердик өнөр темалары чагылдырылган. Ошондой эле Чыңгыз Айтматовдун чыгармаларына негизделген, адамдын өз тарыхы жана тамыры менен байланышын чагылдырган эмгектер коюлган.