Жогорку Кеңештин депутаты Элдар Абакиров Бишкектеги ыш маселесин көтөрүп, эки жылдан кийин борбор калаада көмүр жагууга тыюу салууну сунуштады. Бул тууралуу ал бүгүн, 21-ноябрда парламенттин жыйынында айтты.

Ал Бишкектин чет жакасындагы от жагылган жер тамдар турган конуштарда дем алуу өтө кыйын болуп калганын белгиледи.

“Ыш биздин, балдарыбыздын ден соолугуна катуу таасир тийгизип жатат”, – дейт ал.

Абакиров “Кыргызгаздын” өкүлү Бишкекти 2026-жылга чейин толугу менен газ менен камсыз кыла тургандарын айтканын, борбор калаанын ар бир жерине газ өткөрүлүп калса, эки жылдан кийин көмүр жагууга тыюу салуу керектигин билдирди.

“Ушул жол менен гана абаны тазалай алабыз. Башка жол жок деп ойлойм”, – деди ал.