Ысык-Көл облусунда суурлардын санын эсептөө иштери аяктады. Изилдөөнүн жыйынтыгы боюнча, аймакта 41 миң 286 суур катталганын Жаратылыш ресурстары, экология жана техникалык көзөмөл министрлигинин басма сөз кызматы билдирди.

Маалыматка ылайык, эсептөө иштери ведомствонун Ысык-Көл регионалдык башкармалыгы тарабынан уюштурулган. Адистер бекитилген маршруттар боюнча талаа байкоолорун жүргүзүп, жаныбарлардын саны жана алардын жашоо чөйрөсүнүн абалы тууралуу маалыматтарды топтошту.

Мекемеден белгилешкендей, эсептөө иштери Жаратылыш ресурстары министрлигинин буйругу менен бекитилген жаныбарлар дүйнөсүнүн объектилеринин санын эсептөө боюнча нускамага ылайык аткарылды.

Буга чейин суурлардын санын эсептөө иштери Жалал-Абад облусунда жүргүзүлгөн.