Кыргызстандын Юстиция министрлиги адвокаттык ишмердүүлүк жөнүндөгү мыйзамдарды өркүндөтүүгө киришет. Бул үчүн «Кыргыз Республикасынын Адвокатурасы жана адвокаттык ишмердүүлүк жөнүндө» мыйзамына жана ага байланыштуу ченемдик укуктук актыларга комплекстүү талдоо жүргүзүүчү жумушчу топ түзүлөт.

Мекеменин маалыматы боюнча, бул иштин максаты — адвокатура институтунун натыйжалуулугун жогорулатуу, анын көз карандысыздыгын чыңдоо, кесиптик өз алдынча башкаруу механизмдерин өркүндөтүү жана юридикалык жардамдын сапатын жогорулатуу болуп саналат.

Жумушчу топ колдонуудагы мыйзамдарды изилдеп, укуктук боштуктарды аныктайт жана аларды жоюу боюнча сунуштарды даярдайт.

Топтун курамына Юстиция министрлигинин, Кыргызстандын Адвокатурасынын өкүлдөрү, ошондой эле көз карандысыз эксперттер жана укук тармагындагы адистер кирет.

Юстиция министрлиги ошондой эле адвокаттык коомчулуктун, илимий жана эксперттик чөйрөнүн өкүлдөрүн, ошондой эле бардык кызыкдар тараптарды мыйзамдардагы өзгөртүүлөрдү талкуулоого катышууга чакырды.