Жалал-Абад облусунун аймагында 27-29-апрель күндөрү “Мал ууру” аталышындагы ыкчам алдын алуу иш-чарасы өткөрүлдү. Рейд учурунда буга чейин катталган бир нече уурулук фактыларынын бети ачылды. Бул тууралуу облустук милициядан билдиришти.
Маалыматка караганда, жабырлануучулардын бири 22-апрелге караган түнү үйүнүн короосунан баасы 100 000 сомдук тайын уурдаткан. Бул кылмышка шектүү делип Сузактын 1997-жылы туулган тургуну С.А. кармалган.
Ал эми дагы бир Сузак районунун тургуну 1-апрелге караган түнү базар баасы 42 000 сомдук тайын белгисиз кылмышкерлер уурдап кеткендигин билдирген. Аталган кылмыш ишине шектелип Сузак районунун тургуну 1970-жылы туулган С.И. кармалган.
Токтогул районунун аймагынан 2022-жылдын ноябрь айында жайыттан 50 000 сомдук 1 баш букасын уурдаткандыгын айтып жергиликтүү тургун милицияга арыз менен кайрылган. Бул кылмышка шектелип Токтогул районунун тургуну 2004-жылы туулган К.М. кармалган.
Ошондой эле Жалал-Абад ШИИБге 1-апрель күнү саат 16:00 чамасында автоунаа жуучу жайдын алдынан базар баасы 10 000 сомдук велосипедин уурдаткандыгын айтып, дагы бир жаран кайрылган. Бул факты боюнча Сузак районунун тургуну 1979-жылы туулган К.Э. кармалып, убактылуу кармоочу жайга киргизилген. Тергөөнүн жүрүшүндө шектүү катары кармалган жаран Жалал-Абад шаарынын аймагында бир нече уурулук, тоноо, мал уурулук фактыларына тиешеси бар экендиги аныкталган.
Мындан сырткары рейд учурунда мал союлуучу жана эт сатуучу жайлар текшерилип, эл арасында түшүндүрүү иштери жүргүзүлдү.
Биздин Телеграм каналга катталыңыз
