Өлкө башчы Садыр Жапаров Евразия экономикалык бирлигине (ЕАЭБ) мүчө мамлекеттерде уюштурулган тооруктарда баалуу кагаздарды жайгаштырууга жана жүгүртүүгө чек ара аралык уруксат берүү жөнүндө макулдашууну ратификациялады. Бул тууралуу президенттин басма сөз кызматы билдирди.

Макулдашууга үстүбүздөгү жылдын 31-январында Алматы шаарында кол коюлган.

Макулдашууну ишке ашыруу:

• эмитенттерге ЕАЭБ алкагында кеңири инвесторлор чөйрөсүнө жетүүгө мүмкүндүк берет;
• баалуу кагаздарды чек ара аралык жайгаштыруу жана жүгүртүү жол-жоболорун жөнөкөйлөтөт;
• ЕАЭБге мүчө мамлекеттердин фондулук рынокторунун ликвиддүүлүгүн жана капиталдаштырылышын жогорулатат;
• ЕАЭБге мүчө мамлекеттердин финансы системаларынын интеграциясын бекемдейт.

Бул макулдашуу ЕАЭБдин алкагында эмитенттер жана инвесторлор үчүн бирдей шарттарды түзүүгө, баалуу кагаздарды жайгаштырууда жана жүгүртүүдө административдик тоскоолдуктарды азайтууга, ЕАЭБдин интеграцияланган каржы рыногун өнүктүрүүгө, ошондой эле инвесторлордун укуктарын коргоону камсыз кылууга багытталган.