Президенттик администрациянын жаңы имаратынын курулушу аяктап калды. Бул тууралуу өлкө башчысы Садыр Жапаров Facebook баракчасына жазды.

Анын айтымында, жаңы имаратты  “Ак Ордо”, “Кут Ордо”, “Айкөл Ордо”, “Ынтымак Ордо” деп  атоо пикирлери бар. Президент өлкө жарандарынан дагы сунуштарды күтөт.

“Жалпы элдин сунуштарын, пикирлерин угайын деп чечтим. Анткени бул ат түбөлүк тарыхта калат. Дагы башка аттарды каалагандар болсо сунуштарыңызды бериңиздер.

Сөзсүз түрдө эмне үчүн ушундай атоону сунуштап жатканыңыздын себептерин жаза кетиңиздер”, – дейт Садыр Жапаров.

Белгилей кетсек, жаңы администрациянын курулушу 2022-жылдын апрель айында башталган. Ал мурдакы Ысык-Көл мейманканасынын ордуна курулуп жатат.