Donday басылмасы жазгандай, алар кыргыз, беларус, орус жана үч өзбек жараны болгон. Басылма соттолгондор машыгуу лагеринен 21-22-декабрда качканын жазып, алардын аты-жөнүн тактаган эмес. Качкандар куралчан экени кабарланды.
Украинада Орусиянын армиясы жаз айларында оор жоготууларга учурагандан кийин «Вагнердин жеке аскердик компаниясы» абакта жаткандарды өз катарына кошуп, согушка жөнөтө баштаганы белгилүү болгон. Соттолгондорду азгыруу иштерин бул компаниянын негиздөөчүсү катары таанымал Евгений Пригожин өзү баш болуп жүргүзүп жатканы тартылган видеолор жарыяланган.
Олигарх Евгений Пригожин Орусиянын президенти Владимир Путинге жакын экенин өзү ырастаган.
«Вагнердин жеке аскердик компаниясы» – бейрасмий аскердик түзүм. Анын жалданма аскерлери Украинада, Сирияда жана Африка өлкөлөрүндө жүргөнү тууралуу маалыматтар байма-бай чыгып турат. Вагнерчилер бир катар аскердик кылмыштарга шектелип жүрүшөт.
Кыргызстан Украинадагы согушта нейтралдуу позицияда экенин кайталап келет. Ал согушка катышкан жарандарга мыйзамда катаал жазалар каралганын бир нече жолу эскерткен.
Биздин Телеграм каналыбызга катталыңыз
