Жогорку Кеңеш Адахан Мадумаровду кылмыш жоопкерчилигине тартууга уруксат берди. Маселе 22-июнда жабык эшик артында каралды.
Башкы прокурор Курманкул Зулушевдин сунушуна 17 депутат «каршы», 61 депутат «макул» деп добуш берди.
Белгилей кетсек, депутат Адахан Мадумаровду кылмыш жоопкерчилигине тартууга макулдук берүү боюнча Башкы прокурордун сунушун караган комиссия корутундусун парламентке тапшырды.
Депутаттык комиссия Мадумаровду сунушталган төрт берененин бири – кызмат абалынан кыянаттык менен пайдалануу (кыргыз-тажик чек арасындагы 275 метр асфальт жол) боюнча кылмыш жоопкерчилигине тартууга макулдугун берген.
Ал эми Кемпир-Абад суу сактагычы боюнча (бийликти күч менен басып алуу, массалык баш аламандык) комиссия кылмыш жоопкерчилигине тартууга макул болгон эмес.
Белгилей кетсек, депутат Мадумаровду кылмыш жообуна тартууга макулдук берүү маселесин кароо үчүн атайын депутаттык комиссия түзүлгөн.
31-майда парламенттин жыйынында төрага Нурлан Шакиев депутат Мадумаровду кылмыш жообуна тартууга макулдук берүү үчүн башкы прокурор Курманкул Зулушевден кайрылуу келип түшкөнүн билдирген.
Мадумаровго Кылмыш-жаза кодексинин 36-278-беренесинин 1-бөлүгү (Массалык баш аламандыктарга даярдык көрүү), 36-326-беренеси (Бийликти күч менен басып алууга даярдык көрүү), 338-берене 3-бөлүгү (Бийликтен аша чабуу) боюнча айып тагылып жатканы белгилүү.
Мадумаровду жоопко тартуу сунушу. Депутаттык комиссиянын курамы
Биздин Телеграм каналга катталыңыз
