Жогорку Кеңеш Максат Асаналиевди башкы прокурор кызматынан бошотууга жана аны УКМКнын төрагасы кызматына дайындоого макулдук берди. Мындай чечим бүгүн, 2-сентябрда парламенттин жыйынында бир добуштан кабыл алынды.

Ага чейин бул маселени Жогорку Кеңештин Сот-укуктук маселелер, укук тартиби, кылмыштуулук менен күрөшүү жана коррупцияга каршы аракеттенүү боюнча комитети караган. Депутаттар комитеттин чечимин колдошту.

Максат Асаналиев 30-июнда башкы прокурор кызматынан кетүү тууралуу арыз берген. Андан кийин ал УКМКнын төрагасынын милдетин аткаруучу болуп дайындалган.

Асаналиев кеткенден кийин башкы прокурордун милдетин анын биринчи орун басары Малик Бектурганов убактылуу аткарып келген.