Конституциялык мыйзамдар боюнча комитет риэлторлордун ишмердүүлүгүн көзөмөлдөөнү күчөтүүгө багытталган, Экономика министрлиги тарабынан сунушталган мыйзам долбоорун биринчи окууда жактырды.

Мыйзам долбоорунун демилгечиси – Экономика жана коммерция министрлигинин негиздеме-маалымкатына ылайык, бүгүнкү күндө кыймылсыз мүлк рыногунда риэлторлордун олуттуу бөлүгү каттоосуз жана кесиптик даярдыгы жок иштеп жатат. Ошол эле учурда мыйзам бузуулар үчүн, анын ичинде такталбаган маалыматтарды жана жарнамалык кулактандырууларды тараткандыгы үчүн жоопкерчиликтин натыйжалуу механизмдери жок, бул кардарлардын укуктарына түздөн-түз терс таасирин тийгизүүдө.

Ошондой эле, мыйзам долбоорунун демилгечисинин маалыматы боюнча, бүгүнкү күндө Кыргызстанда 3 миң 200 риэлтор расмий катталган, бирок алардын ичинен 206сынын гана тиешелүү квалификациясы тастыкталган.

Демилгечи эмнени сунуштайт:

• Каттоосуз иштеген риэлторлорго айып пул салынат: жеке жактарга — 10 эсептик көрсөткүч (1 миң сом), юридикалык жактарга — 50 эсептик көрсөткүч (5 миң сом).
• Эгерде ишмердүүлүк жарнама же маалыматтык-коммуникациялык технологияларды колдонуу менен жүргүзүлсө, айып пул жогору болот: жеке жактарга — 20 эсептик көрсөткүч (2 миң сом), юридикалык жактарга — 100 эсептик көрсөткүч (10 миң сом).
• Риэлторлук ишмердүүлүктүн эрежелерин бузгандыгы үчүн жоопкерчилик өзүнчө каралган. Бул учурда айып пул жеке жактарга — 30 эсептик көрсөткүч (3 миң сом), ал эми юридикалык жактарга — 60 эсептик көрсөткүчтү (6 миң сом) түзөт.
• Жарнама же санарип платформаларын колдонууда санкциялар күчөтүлөт: жеке жактарга — 50 эсептик көрсөткүчкө чейин (5 миң сом), юридикалык жактарга — 100 эсептик көрсөткүчкө чейин (10 миң сом).

Мындан тышкары, мыйзам долбоору риэлторлорду милдеттүү түрдө сертификациялоону киргизет. Бул тармакта иштөө үчүн окуудан өтүп, сертификат алуу зарыл болот, ал эми адистердин маалыматтары атайын мамлекеттик реестрге киргизилет. Ошондой эле риэлторлук кызмат көрсөтүүнүн бирдиктүү сапат стандарттары белгиленет.