«Манас» эл аралык аэропорту өз ишин жандантты, деп билдиришти «Кыргызстан аэропорттору» ААКтан.

Эске салсак, кечээ Бишкек — Ош багыты боюнча каттамды аткарып жаткан TezJet авиакомпаниясынын учагы шассисине доо кеткендигине (бузулгандыгына) байланыштуу абага көтөрүлө албай калган. Алдын ала маалыматтарга караганда, учактын ичинде 181 жүргүнчү, анын ичинде 18 бала болгон. Эч ким жабыр тарткан эмес.

«Көптөгөн авиакомпаниялар каттамдарын саат 14:00дөн баштап пландаштырса, айрымдары аларды дароо эле кечке жылдырышты. Бирок ушул мүнөттөн тарта алар өздөрүнүн графигин (жүгүртмөсүн) түзүүгө киришти. Түнкү саат 12ге чейин мурда кармалып калган бардык каттамдар аткарылат», — деп түшүндүрүштү «Кыргызстан аэропорттору» ААКтан.

Окуянын кесепетинен аэропорт аба кемелерин кабыл алууну жана узатууну убактылуу токтоткон болчу.