КР Юстиция министрлиги санкциялык тобокелдиктери жогору болгон операцияларга аралашкан 50 юридикалык жактын ишмердүүлүгүн бир убакта токтотуу боюнча биринчи жолу буйрук чыгарды. Бул тууралуу ведомствонун басма сөз кызматы билдирди.

Бул чара «Тышкы экономикалык ишмердүүлүктүн ак ниет эмес катышуучуларын жана санкциялык тобокелдиктери жогору операцияларды аныктоо боюнча ведомстволор аралык өз ара аракеттенүү жөнүндө» жаңы ведомстволор аралык буйрукту ишке ашыруунун алкагында кабыл алынганы такталууда.

Басма сөз кызматы түшүндүргөндөй, компаниялардын тизмеси КР Экономика жана коммерция министрлиги жана санкциялык режимдин алкагындагы чектөөлөрдөн качуунун мүмкүн болгон фактылары тууралуу маалыматтарды карап чыккан башка мамлекеттик органдар тарабынан берилген.

«Улуттук экономиканы коргоо жана батыш өнөктөштөр тарабынан мүмкүн болгон экинчи даражадагы санкциялык чаралардан Кыргызстан үчүн терс кесепеттерге жол бербөө максатында бир катар контролдоо механизмдери кабыл алынган. Алардын катарында КР Министрлер кабинетинин тиешелүү чечиминин алкагында юридикалык жактардын ишмердүүлүгүн тиешелүү сунуштаманын негизинде жөнөкөйлөтүлгөн механизм менен токтотууга мүмкүндүк берген «Тышкы экономикалык ишмердүүлүктүн ак ниет эмес катышуучуларын жана санкциялык тобокелдиктери жогору операцияларды аныктоо боюнча ведомстволор аралык өз ара аракеттенүү жөнүндө» ведомстволор аралык буйрук бар», — деп айтылат билдирүүдө.

Эскерте кетсек, февраль айынын башында Европа Биримдиги тарабынан ЕБ өлкөлөрүнө Орусияга каршы санкциялардын 20-пакети сунушталган. Жаңы пакетке кыргызстандык финансылык мекемелер — «Керемет Банк» ААК жана «Борбор Азия Капитал Банкы» ААК кирген.