Кыргызстандын Энергетика министрлиги 14-августта өлкөнүн энергетика тутумунда болгон технологиялык мүчүлүштүктүн себептерин түшүндүрдү.

Мекеменин басма сөз кызматынын маалыматына караганда, саат 15:37де технологиялык бузулуудан кийин Кыргызстандын энерготутуму Борбордук Азиянын Бириккен энергетикалык тутумунан (БА БЭТ) бөлүнүп, обочолонгон режимде иштөөгө өткөн.

Энергетиктер кырдаалды турукташтыруу боюнча чараларды көрүп, саат 15:55ке карата энерготутумдагы жыштык нормалдуу деңгээлге — 50 герцке чейин калыбына келтирилген. Ошол эле учурда, Энергетика министрлигинин маалыматы боюнча, Кыргызстан коңшу мамлекеттерге болжол менен 250 мегаватт кубаттуулукту берип жаткан.

Алдын ала талдоо көрсөткөндөй, Токтогул ГЭСинде эки гидроагрегат кыска убакытка өчүп калган.

Энергетика министрлиги билдиргендей, бул Борбордук Азиянын Бириккен энергетикалык тутумундагы алгачкы бузулуу болгон. Андан кийин кубаттуулуктун агымы өзгөрүп, аварияга каршы автоматика иштеп кеткен.

Ошону менен бирге, мекеме Токтогул ГЭСиндеги эки гидроагрегаттын өчүрүлүшүн башка өлкөлөрдөгү энергетика тутумдарынын жана электр тармактарынын кийинки өчүрүлүшүнүн түз себеби катары кароого болбой тургандыгын баса белгиледи.

Энергетиктердин пикиринде, коңшу мамлекеттердеги жарыктын үзгүлтүккө учурашынын себептерин аныктоо үчүн, баштапкы бузулуудан кийин алардын энерготутумдарында болгон процесстерди өзүнчө талдоо зарыл.

Технологиялык мүчүлүштүктүн себептерин атайын комиссия иликтейт.

Энергетика министрлиги биргелешкен техникалык иликтөө аяктаганга чейин, авариянын бардык кийинки кесепеттери үчүн жоопкерчиликти Кыргызстандын энерготутумуна жүктөө эрте экенин белгиледи.

Эскерте кетсек, 14-августта Бишкекте электр энергиясы менен камсыздоодо үзгүлтүктөр байкалган. Шаардын айрым райондорунда чыңалуунун кескин өзгөрүшү жана жарыктын өчүшү катталган.

Кийинчерээк Кыргызстандын Улуттук электр тармагы (КУЭТ) 14-августта саат 15:34тө Казакстандын энерготутумунун түндүк жана түштүк бөлүктөрүн бириктирген жогорку чыңалуудагы линияда сырттан өчүрүү болгонун билдирген. Натыйжада Борбордук Азиянын Бириккен энергетикалык тутуму (БА БЭТ) обочолонгон энерготүйүнгө бөлүнгөн.

Кыргызстандын энерготутуму убактылуу обочолонгон режимде иштөөгө өткөн.

Өз кезегинде казакстандык ЖМКлар «Казакстандын электр тармактарын башкаруу компаниясы» (KEGOC) ААКтын тутумдук кызматтар боюнча башкаруучу директору Нуржан Керимкуловго шилтеме жасап, 14-август күнү түштөн кийин Казакстандын аймагында жарыктын өчүшү Токтогул ГЭСиндеги авариялык кырдаалдан улам болгонун жазып чыгышкан.