Бул жумада Жогорку Кеңештин депутаттары жарандарды каттоо, мектепке чейинки билим берүү жана эмгек мыйзамдарына байланыштуу бир нече мыйзам долбоорун үчүнчү окууда кабыл алышты. Эми эмне өзгөрөрүн жөнөкөй тил менен түшүндүрөбүз.

Каттоо жөнөкөйлөштүрүлөт

Кабыл алынган мыйзам долбоорлорунун бири «Ички миграция жөнүндө» мыйзамга өзгөртүү киргизүүгө байланыштуу болду. Бийлик эскирип калган жана бири-бирин кайталаган нормаларды мыйзамдан алып салууну чечкен.

Эми жашаган жери боюнча каттоого туруу үчүн эркек жарандарга аскердик каттоого туруу же андан чыгуу процедурасынан алдын ала өтүүнүн кереги жок болот. Маалымкат-негиздемеде бул талап көп учурда каттоого тоскоол болуп, ашыкча бюрократия жараткандыгы айтылат.

Ошондой эле мыйзамдан мурда каттоо үчүн колдонулуп келген айрым документтер алынып салынат. Мисалы, аскер бөлүктөрүнүн маалымкаттары жана кайрылмандын күбөлүгү. Министрлер кабинети мындай документтер толук кандуу өздүгүн тастыктаган документ болуп эсептелбей турганын же тышкы миграция тармагына тиешелүү экенин билдирген.

Мындан тышкары, мыйзамдагы айрым терминдер өзгөртүлүп, ал “Укук бузуулар жөнүндө” жаңы кодекске ылайыкташтырылат. Жалпысынан бийлик бул өзгөртүүлөр процедураларды жөнөкөйлөтүп, мыйзамдардагы түшүнүксүздүктү жоёт деп эсептейт.

Кыргызстан бала бакчалар үчүн 6 миллион доллардан ашык каражат алат

Дагы бир кабыл алынган мыйзам долбоору “Келечек үчүн билим берүү” долбоору боюнча Эл аралык өнүктүрүү ассоциациясы менен түзүлгөн макулдашууну ратификациялоого байланыштуу болду.

Сөз жалпы суммасы 6,36 миллион доллар болгон кошумча каржылоо тууралуу болууда. Анын ичинен 4,36 миллион доллары — насыя, дагы 2 миллион доллары — грант.

Бул каражат мектепке чейинки билим берүүнү өнүктүрүүгө жумшалат. Атап айтканда:

• 9 бала бакча оңдолуп, ачылат;
• иштеп жаткан бала бакчалардагы орундар көбөйтүлөт;
• мектепке чейинки билим берүүдө мамлекеттик-жеке өнөктөштүк модели сыноодон өткөрүлөт;
• бала бакчанын кызматкерлери жана ишкерлер үчүн окутуулар уюштурулат.

Бийлик бул чаралар мектепке чейинки билим берүү менен камтылган балдардын санын көбөйтүүгө жардам берет деп эсептейт.

Насыя 50 жылдык мөөнөткө берилет. Анын ичинде 10 жыл жеңилдетилген мөөнөт каралган. Пайыздык үстөгү — 0%.

Парламент айлыкты өз убагында төлөө тууралуу эски мыйзамдын бир бөлүгүн жокко чыгарды

Депутаттар ошондой эле эмгек жана социалдык камсыздоо тармагындагы мыйзамдарга өзгөртүү киргизүү тууралуу мыйзам долбоорун кабыл алышты.

Негизги өзгөрүүлөрдүн бири — 1996-жылдан бери иштеп келген “Эмгек акыны, пенсияларды, жөлөк пулдарды, стипендияларды жана башка социалдык төлөмдөрдү өз убагында берүү жөнүндө” мыйзам күчүн жоготту деп табылышы болду.

Аны менен кошо мыйзамдардагы 11ге жакын берене жана өзүнчө нормалар алынып салынат.

Министрлер кабинети муну көптөгөн жоболор Эмгек кодексинде жана башка мыйзамдарда кайталанып калгандыгы, айрым нормалар эскиргендиги менен түшүндүрүүдө. Бийлик кызматкерлер жана социалдык төлөм алуучулар үчүн негизги кепилдиктер сакталат деп ишендирүүдө.

Ошол эле учурда мурдагы мыйзам айлык жана социалдык төлөмдөр кечиктирилсе жоопкерчилик карап, кечиккен төлөмдөр үчүн компенсация жана туум төлөөнү талап кылчу.