«Массалык башаламандыкка чакырык жасоого» айыпталып жаткан жаш активист Ырыс Жекшеналиевди прокурор 7 жылга абакка кесүүнү сурады. Бул тууралуу Reporter.kg’ге анын жактоочусу Нурбек Сыдыков билдирди.
Бүгүн Биринчи май райондук сотунда өткөн отурумда тараптар жарыш сөзгө өткөн. Анда прокурор активист Ырыс Жекшеналиевди 7 жылга эркинен ажыратууну суранган. Буга чейин мамлекеттик айыптоочу активистти 6 жылга соттоону сунуштаган болчу.
Кийинки отурум 27-ноябрга саат 16:30га белгиленди.
Анда Ырыс Жекшеналиевге акыркы сөз берлип, сот өкүм чыгарары күтүлөт.
Эскерте кетсек, 2022-жылы 14-августта президент Садыр Жапаров Жетим-Тоо кени боюнча билдирүү жасаган. Анда президент айрым адамдар Жетим-Тоо боюнча туура эмес маалымат таратып жатканын айтып, укук коргоо органдарына аларды тартипке чакырууну тапшырган. Ага чейин «Фейсбуктагы» «Полит Узник» баракчасына УКМКнын мурдагы төрагасы Абдил Сегизбаевдин Жетим-Тоо боюнча архивдик билдирүүсү жарыяланган.
Аталган видеону соцтармактарга чыгарган «Полит Узник» баракчасынын администратору Ырыс Жекшеналиевге кылмыш иши козголуп, 16-августта камакка алынган.
Арадан 2,5 ай өткөндөн кийин 26-октябрда Бишкек шаардык соту Жекшеналиевди үй камагына чыгарган.
Сүрөт: «Кылым шамы» коомдук фонду
Биздин Телеграм каналга катталыңыз
